منتديات بوابة العرب

منتديات بوابة العرب (http://vb.arabsgate.com/index.php)
-   منتدى الأسرة والمجتمع (http://vb.arabsgate.com/forumdisplay.php?f=5)
-   -   سهلوها على الناس وأكرموا بناتكوا (http://vb.arabsgate.com/showthread.php?t=581036)

عبدالرحمن الناصر 01-08-2019 04:44 PM

سهلوها على الناس وأكرموا بناتكوا
 
.




سهلوها على الناس وأكرموا بناتكوا


قدم لها قائمة جهاز بإجمالي مليون ومائة ألف جنيه ..وبمؤخر صداق قدره ٣٥٠ ألف جنيه وشبكة ب ب ٢٢٣ ألف جنيه ..لعروسة اتجوزت من سنة تحديدا ..جاتلي النهاردة عشان ترفع على جوزها القايمة بعد ما دخلوا في مشاكل وعملها عاهة مستديمة في عنيها للأسف ..العين اليمين مبقتش تشوف بيها ..وهي اللي طلبت وأصرت أحكي الحكاية دي ..من فترة إتقدملها ٢عرسان ..واحد على قد حاله ..بيشتغل في مصنع من مصانع التعبئة والتغليف في وظيفة إدارية .. كان واضح عليه إنه محترم جدا ..بيتقي ربنا ..شافها كذا مرة وشاريها ..دخل واتقدم وقال يا جماعة أنا مقدرتي أجيب ب ٣٠ ألف جنيه شبكة وهجيب ٣ أوض وكل اللي معايا مش هبخل بيه عليها والله ..لكن حقيقي دي مقدرتي لكن لما ربنا يكرمني عمري ما هبخل بحاجة ده هيبقى بيتي ومراتي اللي مسئولة مني وعاوز أفرحها دايما وأشوفها مبسوطة ..سألوا عليه عرفوا إنه محترم وإبن ناس طيبين في نفس التوقيت إتقدم واحد تاني قدم عرض أعلى بكتير وكأننا في مزاد ..شبكة بربع مليون جنيه وعربية وعنده شقة ومؤخر ٣٥٠ألف وقيس على كده كل حاجة ..أهلها رفضوا الأول بحجة إنه ممعاهوش وإن البنت مش هيأمن لها مستقبلها غير الفلوس ..رغم إن البنت كانت مرتاحاله جدا وحست إنه هيتقي ربنا فيها بعد ما قعدوا وإتكلموا

وافقوا على التاني على الرغم من إنهم عرفوا إنه إتقدم كذا مرة لكذا حد ومحصلش نصيب ..حتى طريقة أهله في القعدة كان واضح إنهم جايين يشتروا حاجة مش يتجوزوا ..بيعة وشروة ..حتى شخصيته كان فيها غموض ومش واضح ..وافقوا عليه لانه بيمتلك المال .. وغصب عنها وافقت واتجوزوا

بعد فترة من الجواز بدأ يخنق عليها ..مفيش إحترام ..إهانة ..ضرب ..حبس في البيت ..لو الشاي طلع سكره زيادة شوية بيضربها ..لاغي شخصيتها تماما ..بيفتش وراها في كل خطوة ..بيشك حتى في النفس اللي طالع منها ..مهما عملتله بيحسسها إنها ولا عملت حاجة وإن كل الناس أحسن منها ..مركب الكل عليها ومخليها مسخة وسط الناس ده غير بلاوي كتير مقدرش أقولها

إشتكت لأبوها قالها إستحملي ..إستحملت شوية لكنها جت على الآخر وإنفجرت ..صحيت من النوم عليه وهو بيقومها وبيزعق وبيقولها فين قميصي ..قالتله هتلاقيه عندك ..شدها من شعرها وضربها وزقها وقعت عنيها اتخبطت في حاجة كانت طالعة من الجدار ..بتبص لقت نفسها مش شايفة بيها ..مسكها ورماها برا البيت وجري وهي بتنزف اتصلت بأبوها وراحت على المستشفى ..الدكتور قالها إن فيه مشاكل في الشبكية وهنعمل عملية ونسبة نجاحها دي بتاعة ربنا

بتقولي واللي كان متقدملي الاول اتجوز واحدة اعرفها ومعيشها في هنا ونعيم رغم ضيق حاله اوقات لكن باين على وشها انها مرتاحة ومطمنة..انا كنت عاوزة اطمن وعاوزة حنية وتقدير ووالله لو هاكل ملح

عملت إيه الفلوس ؟ راحت عنيها ومش هتشوف بيها وكرامتها اتبعترت وراحت هي شخصيا ..اتهزت وانكسرت ..كل القايمة دي حتى لو خدت فلوسها بعد سنين في المحاكم خاصة انه مختفي هترجعلها عنيها ؟

الأهل أوقات بيفكروا إن الفلوس هي كل حاجة ..هي الأمان والمستقبل ..وإن البنت هتبقى مرتاحة لو اتباعت بالغالي ..عمر البنت ما كانت سلعة بتتباع ..وإن الطيب الجدع إبن الأصول اللي هيتقي الله في بنتكوا لكن ممعاهوش أنضف وأشرف ميت مرة من اللي معاه ملايين

المحترم اللي معاه ألف وهيدفعه كله عشان شاري أحسن من اللي معاه مليون وهيدفع ربعه ..عمرها ما بتتقاس بالفلوس ..انت بتختار راجل تآمنه على بنتك اللي هي أغلى حاجة عندك ..مش بفلوسه ولا عربياته ولا بالقائمة أم مليون جنيه

يسروا ولا تعسروا ..إختاروا الأخلاق قبل المال ..وبنتك لما تصحى الصبح على حنية وابتسامة وطبطبة من واحد على قد حاله بيحاول وبيشتغل وبيعافروا سوا لحد ما ينجحوا أحسن لها مليون مرة لما تصحى على إهانة من مليونير

قد يكون عند ربنا اللي هيجيب شبكة قليلة ده اكتر بركة وتقوى من غيره ..مش هيخلي بنتك نفسها في حاجة حتى لو آخر جنيهين في جيبه ..المهم يشوفها مبسوطة ..وممكن يكون غني برضه ومحترم وممكن يكون على قد حاله وخسيس وده يعلمنا إننا نبص على الأخلاق والمنبع قبل أي شئ ..والمال آخر حاجة نبص ليها .. سهلوها على الناس وأكرموا بناتكوا باللي يستحقوا .

منقووووووووول






أبو سندس 02-08-2019 11:02 PM

المرأة لا تحدد قيمتها بمهرها ولا بالعكس ولكن الاغبياء هم من يعتقدون هذا المذهب الغبي وهو ما تسبب في العزوبية والعنوسة عندنا رغم ان الزواج من اسهل الاشياء في الاسلام نسال الله العافية.

عبدالرحمن الناصر 04-08-2019 04:42 PM

اقتباس:

المشاركة الأصلية كتبت بواسطة أبو سندس (المشاركة 4109372)
المرأة لا تحدد قيمتها بمهرها ولا بالعكس ولكن الاغبياء هم من يعتقدون هذا المذهب الغبي وهو ما تسبب في العزوبية والعنوسة عندنا رغم ان الزواج من اسهل الاشياء في الاسلام نسال الله العافية.



كلامك صحيح لأننا لوأخذنا قيمة المهر وحده مقياس لقيمة المرأة فقد ظلمنا بناتنا ظلما"كبيرا
وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ
نعم المودة والرحمة لذلك علينا أن ننتقى لبناتنا الأفضل
وقد قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره.

شكرا" لك أخى أبو سندس على حضورك للموضوع وتعقيبك المثمر
مع خالص تحيتى






.

امي فضيلة 04-08-2019 10:11 PM

حياك الله اخي الفاضل عبد الرحمن

ما اروع ما نقلته

بالفعل اليوم اصبحت ابنت كسلعة لمن يدفع اكثر

ولا يفكرون بالباقي انما الفلوس والذهب عندهم هو الاهم من بنتهم

لو يفكرون قليلا بالزواج الصالح لبنتهم حتى المهر يقللون على اقل من مستوى الزوج

لان حين يضيقون على الذي على قد حاله وهو ابن ناس وشاري البنت

يفكرون بان المهر وما الى ذلك من شبكة وغرف حين يحتاج الزوج ان يتداين

ليكمل البيت ليتزوج ان اهل الزوجة يحملونه اكثر من مقدرته

هنا ابنتهم ايضا ستكون محتاجة لكل شيئ

اما الغني والمتمكن يكون شاري البنت بالمزاد العلني

وكل يوم مشاكل انا دفعت المهم انطفات الكهرباء ولا استطيع الاكمال


الساعة الآن 06:47 AM.

Powered by vBulletin® Version 3.8.4
Copyright ©2000 - 2019, Jelsoft Enterprises Ltd.